आमा तिम्रो नाम के हो ?

–लक्ष्मी माली

 

आमा तिम्रो नाम के हो ?
हजुरबा छोरी भन्नु हुन्छ
मामा दिदी भन्नु हुन्छ
बाबा श्रीमती भन्नु हुन्छ
म आमा भन्छु
आमा तिम्रो नाम के हो ?

म बिद्यालय गएँ
महाविद्यालय गएँ
त्यहाँ तिम्रो नाम चाहिएन
धेरैलाइ परिचय दिएँ
कसैबाट तिम्रो नाम सोधिएन
म बालिग भएँ
मताधिकार पाएँ
मेरो परिचयपत्र मा तिम्रो नाम लेखिएन

म नागरिक भएँ
बाबुकै नाम बाट
म जागिरे भएँ
बाबुकै नामबाट
म बेनाम आमाकी छोरी
भन आमा तिम्रो नाम केहो ?
कसैबाट सोधनी नभएको
कतै उच्चारण गर्न नपरेको
तिम्रो नाम
सार्बजनिक गर्न चाहन्छु म
धर्ति भन्ने उपनाम होइन आमा
मलाई तिम्रै नाम चाहिन्छ
भन आमा
तिम्रो नाम केहो ?

प्रतिक्रिया दिनुहोस्

Leave a Reply

Your email address will not be published. Required fields are marked *